Manyara. Katibu Mkuu wa Chama cha Mapinduzi (CCM) Dk Emmanuel Nchimbi amesema viongozi wa chama hicho na wale wa Serikali wasioguswa na matatizo ya wananchi, hawatoshi kwenye nafasi hizo.
Dk Nchimbi ameyasema hayo leo Jumapili, Juni 2, 2024 katika eneo la Mijingu, Mkoa wa Manyara, akiwa njiani kuelekea mkoani Arusha kuendelea na ziara ya kufuatilia utekelezaji wa ilani, kuangazia maandalizi ya chaguzi zijazo na kusikiliza kero za wananchi.
Katika maneno yake machache, Dk Nchimbi ameushukuru uongozi wa Manyara wa chama na Serikali chini ya Mkuu wa Mkoa huo, Queen Sendiga kwani ameona utekelezaji wa ilani unavyokwenda.
“CCM kitaendelea kuzisimamia Serikali zake kuona kwamba zinawahudumia wananchi kwa upendo na kwa juhudi na wakati wote hatutasita kuhangaika na kero za wananchi.
“Kero za wananchi na matatizo ya wananchi ni ya kwetu na wakati wote kiongozi wa chama cha mapinduzi na Serikali ya CCM asiyeguswa na matatizo ya wananchi hatoshi kwa nafasi hiyo,” amesema Dk Nchimbi.
Onyo kama hilo liliwahi kutolewa na Rais Samia Suluhu Hassan. Septemba 17, 2023 wakati akizungumza na wananchi kwenye mkutano wa hadhara Masasi Mjini mkoani Mtwara, Rais Samia alisema, “nitoe wito kwa uongozi mzima wa mkoa na ngazi zote hadi uongozi wa vijiji na mtaa kusikiliza na kutatua kero za wananchi. Mtakaposhuka jamani, nyinyi sio watawala, hata mimi sio mtawala, mimi ni mtumishi wa wananchi, mawaziri wangu ni watumishi wa wananchi, tuliowashusha chini huku kutuwakilisha ni watumishi wa wananchi.”
“Unapoacha kiti cha utumishi ukakaa kiti cha utawala ndio maana huwezi kushuka kwa mwananchi kwenda kumsikiliza, niombe sana viongozi wa CCM simamieni hilo. Serikali hii mmeiweka nyinyi sasa mkijifanya wadogo na kufanya watendaji kuwa wakubwa mnakosea, wasimamieni watendaji warudi wakasimamie wananchi,” alisema.
Awali kwenye mkutano wa Dk Nchimbi, Mwenyekiti wa CCM, Mkoa wa Manyara, Peter Toima amemshukuru wamejipanga kwa ajili ya uchaguzi wa Serikali za mitaa na uchaguzi mkuu wa mwaka.
“Tutayafanyia kazi katika kuendelea kukijenga chama, nataka nikuhakikishe tupo tayari kwa uchaguzi wa Serikali za mitaa mwaka huu na mwakani tutakichagua Chama Cha Mapinduzi.”
Naye Mwenyekiti wa CCM, Mkoa wa Arusha, Thomas Ole Sabata amemkaribisha Dk Nchimbi Arusha na kueleza wako tayari kwa ziara hiyo.
Katika ziara hiyo, Dk Nchimbi ameambatana na Katibu wa Itikadi, Uenezi na Mafunzo, Amos Makalla pamoja na Katibu wa Siasa, Uhusiano wa Kimataifa, Rabia Abdallah.
