Dodoma. Waziri wa Nchi, Ofisi ya Rais, Tawala za Mikoa na Serikali za Mitaa (Tamisemi), Mohamed Mchengerwa, juzi alizindua kanuni za uchaguzi wa Serikali za mitaa na kutangaza siku ya kupiga kura.
Katika uzinduzi huo, aliwahimiza wananchi kujitokeza kwa wingi kushiriki katika uchaguzi huo kwa kuchagua viongozi wa mitaa, vijiji na vitongoji.
Waziri Mchengerwa alisisitiza umuhimu wa ushiriki wa wananchi katika mchakato huo wa kidemokrasia ili kuhakikisha viongozi wanaochaguliwa wanawakilisha kwa ufanisi masilahi ya jamii zao.
Pia, alieleza kuwa kanuni hizo zitasaidia kuimarisha mchakato wa uchaguzi na kuhakikisha uwazi na haki kwa wote wanaoshiriki.
Wenyeviti wa Serikali za mitaa, vijiji na vitongoji ni viongozi muhimu katika mfumo wa utawala wa kijamii nchini.
Wanawajibika kwa kusimamia na kuratibu shughuli za maendeleo na usalama katika maeneo yao, kama vile kuimarisha demokrasia ya uwakilishi kwenye ngazi ya jamii.
Umuhimu wao unatokana na nafasi yao kama wawakilishi wa Serikali na wananchi, wanaohakikisha kwamba, sera za kitaifa zinafika na kutekelezwa kwenye ngazi ya chini kabisa ya utawala.
Wenyeviti ni kiungo muhimu kati ya wananchi na Serikali, wana jukumu la kuwasilisha maoni, changamoto na mahitaji ya wananchi kwa Serikali kuu na mamlaka nyingine katika kustawisha maendeleo ya wananchi.
Pia, wanasaidia kuhakikisha mipango na sera za Serikali zinaeleweka na kutekelezwa ipasavyo katika jamii zao.
Viongozi hawa pia wana jukumu la kuratibu shughuli za ulinzi shirikishi, ambazo ni muhimu kwa kudumisha amani na utulivu katika jamii.
Aidha, wanahusika katika kutatua migogoro ya kijamii kwa njia ya usuluhishi na mazungumzo, hivyo kupunguza uwezekano wa vurugu.
Mwananchi anapomchagua kiongozi kwenye eneo lake anahitaji maendeleo na wenyeviti ndio husaidia katika kuandaa na kusimamia mipango ya maendeleo katika maeneo yao. Ndio waratibu wa shughuli za kijamii kama vile ujenzi wa shule, zahanati, barabara na miradi mingine ya maendeleo inayolenga kuboresha hali ya maisha ya wananchi.
Pia, wanahakikisha kwamba rasilimali zinazopatikana, kama vile fedha za Serikali na michango ya wananchi, zinatumika ipasavyo.
Viongozi hawa ndio wanaowezesha ushiriki wananchi katika uamuzi kwenye ngazi ya kijiji, kitongoji na mtaa.
Ndio wanaratibu mikutano ya hadhara na wananchi wanajadili na kutoa maoni yao kuhusu masuala yanayohusu maendeleo ya jamii yao. Hii inasaidia kukuza uwazi na uwajibikaji katika utawala.
Viongozi hawa ndio wanaosimamia ardhi, mfano kumekuwa na migogoro mingi ya ardhi kwenye maeneo mbalimbali ya nchi na viongozi hawa ndio wasimamizi.
Pia, wenyeviti wana jukumu la kusimamia matumizi ya ardhi na rasilimali za asili katika maeneo yao.
Wanahakikisha kwamba matumizi ya ardhi yanazingatia sheria na kanuni zilizowekwa na wanawajibika kwa kuzuia uvamizi wa maeneo yasiyoruhusiwa.
Pia, wanashirikiana na mamlaka husika katika kutoa vibali vya matumizi ya ardhi na rasilimali nyingine.
Hawa ndio wanawajibika kwa kushughulikia masuala ya kijamii kama vile elimu, afya na ustawi wa jamii.
Ni viongozi wanaohusika katika kuratibu shughuli za elimu, kama vile kampeni za kuhamasisha uandikishaji wa watoto shuleni na kushirikiana na wahudumu wa afya katika kuendesha kampeni za chanjo na huduma za afya za msingi.
Wakati wa uchaguzi, wenyeviti wana jukumu muhimu la kuratibu na kusimamia shughuli za uchaguzi katika maeneo yao.
Wanasaidia kuhakikisha kwamba uchaguzi unafanyika kwa amani, uwazi, haki na kwamba wananchi wanapata fursa ya kushiriki kikamilifu katika mchakato wa kidemokrasia.
Pia, wenyeviti ndio wanachangia katika kukuza utawala bora kwa kusimamia uwajibikaji katika matumizi ya rasilimali za umma.
Wanahakikisha kwamba, mipango ya maendeleo inatekelezwa kwa mujibu wa taratibu na sheria zilizowekwa na kwamba kuna uwazi katika maamuzi na matumizi ya fedha za umma.
Majukumu mengine ya viongozi hao ni kuwatambua wageni wote wanaoingia kwenye maeneo, kwa maana ya kudumisha amani na utulivu na pia kuepusha wageni hao kudhaniwa ni wahalifu.
Hii ni hatua muhimu inayosaidia katika kudumisha usalama, kuimarisha uhusiano mzuri kati ya wageni na wenyeji na kuepusha hisia za hofu au shaka zinazoweza kutokea.
Kwa mfano, wageni wasiojulikana wanapoingia katika eneo jipya bila kujitambulisha, wenyeji wanaweza kuhisi hofu au wasiwasi kuhusu usalama wao.
Kujitambulisha kwa viongozi wa mitaa husaidia kuondoa hofu hii kwa sababu viongozi wanaweza kuthibitisha utambulisho wa mgeni na kusudi la ziara yao. Kwa njia hii, jamii inaweza kuhisi salama zaidi na kushirikiana na wageni bila wasiwasi.
Pia, wageni wanapojitambulisha rasmi kwa viongozi wa Serikali za mitaa, vijiji au vitongoji, wanaonyesha heshima kwa utaratibu wa jamii hiyo.
Hii inaleta mazingira ya uaminifu na uhusiano mzuri kati ya wageni na wenyeji.
Viongozi wa mitaa wanaweza pia kuwasaidia wageni kujua sheria, taratibu na desturi za eneo husika, hivyo kuepusha migogoro inayoweza kutokea kutokana na kutokuelewana.
Pia, katika maeneo mengi, uhalifu unahusishwa na watu wasiojulikana wanaoingia bila taarifa.
Wageni wanapojitambulisha kwa viongozi wa mitaa, wanasaidia katika kuimarisha ulinzi wa jamii kwa sababu viongozi wanaweza kufuatilia mienendo yao na kuhakikisha kwamba hawana nia mbaya.
Kujitambulisha kwa viongozi wa mitaa kunaweza kuwa muhimu sana katika matukio ya dharura, kama vile magonjwa, ajali au majanga mengine.
Viongozi wa mitaa wakiwa na taarifa za wageni waliopo katika maeneo yao, wanaweza kutoa msaada wa haraka na sahihi inapohitajika.
Pia, taarifa hizi zinaweza kusaidia katika kuwasiliana na familia za wageni endapo kutatokea jambo lolote la dharura.
Kwa mfano, wageni wanaoweza kuonekana kuwa na siri au wasiojulikana wanaweza kuibua hisia za uhasama au ubaguzi kutoka kwa wenyeji.
Kujitambulisha kunasaidia kuondoa hali hii kwa sababu wageni wanakuwa sehemu ya jamii na wanakubaliwa kwa urahisi zaidi.
Hii inasaidia kujenga jamii yenye mshikamano na kuondoa tofauti za kijamii zinazoweza kuleta mgawanyiko.
Pia, mchakato wa kujitambulisha kwa viongozi wa mitaa unaonyesha uwazi na uwajibikaji kutoka kwa mgeni.
Inaonyesha kwamba, mgeni hana nia ya kuficha lolote na yupo tayari kushirikiana na viongozi na wenyeji kwa uwazi.
Kama una maoni kuhusu habari hii, tuandikie ujumbe kupitia WhatsApp: 0765864917.