Malezi ya mtoto wa kiume ni safari inayohitaji uvumilivu, upendo na ushirikiano wa karibu kati ya wazazi.
Na tunaambiwa ili kumjenga mtoto huyo akue kwa maadili, uwajibikaji na stadi za maisha, ndiyo njia sahihi zaidi ya kuelekea nayo kwa sababu itamwezesha kuwa baba bora atakayejali na kuongoza familia yake kwa upendo na hekima.
Na tukumbuke kuwa malezi haya ndiyo zawadi kubwa zaidi ambayo mzazi unaweza kumzawadia mtoto wake na vizazi vyake vijavyo.
Asilimia kubwa ya watu wanasema malezi ya mtoto wa kiume, ni jukumu muhimu ambalo linahitaji ushirikiano wa karibu kati ya wazazi wote wawili.
Hata hivyo, hivi sasa ukitazama kwa kina, utabaini wazazi na jamii inaelekeza nguvu zaidi kwa mtoto wa kike na kumsahau huyo wa kiume, jambo tunaloelezwa kuwa huenda likawa na madhara pia mbele ya safari.
Leo namzungumzia mtoto wa kiume kwa sababu huyu mtoto wa kiume anayelelewa katika mazingira mazuri na ya kujenga, ana nafasi kubwa ya kukua na kuwa baba bora, anayejali na mwenye uwajibikaji.
Lakini kama wazazi watakosea malezi dhidi yake, ni wazi hata akikua familia yake inaweza kuwa na shida kubwa pasi kujua chanzo halisi ni kipi. Ili kufikia lengo, basi wazazi wanapaswa kuanza kuchukua hatua mapema na miongoni mwazo ambazo ni muhimu zinazopaswa kuchukuliwa na wazazi ni pamoja na ya kumfanya aje kuwa kielelezo bora kwa jamii inayomzunguka.
Hii ni kwa sababu mtoto wa kiume mara zote hujifunza zaidi kupitia mifano halisi kutoka kwa wazazi wake, hasa baba.
Baba anayejali familia, anayeonyesha heshima kwa mama na kuwa mwaminifu, humfundisha mtoto wake maadili na uwajibikaji. Na mama naye anapaswa kuonyesha upendo na heshima kwa baba, ili mtoto aone umuhimu wa ushirikiano na mawasiliano mazuri baina ya watu hawa wawili.
Lakini ili kutekeleza hilo na mtoto awe ananakili kutoka kwao, wazazi hawa wanapaswa kuzungumza na mtoto wao wa kiume kuhusu masuala ya jinsia, maadili na majukumu ya kifamilia.
Hii itasaidia kumfundisha mtoto umuhimu wa kuheshimu wanawake na kuwajibika kwa familia yake ya baadaye na mazungumzo haya yanapaswa kuwa ya wazi na yasiyomhukumu, ili mtoto apate nafasi ya kuuliza maswali na kuelewa kwa kina.
Wazazi, hasa wa kizazi cha sasa, mnapaswa kukumbuka kuwa mtoto wa kiume naye anapaswa kufundishwa stadi za msingi, ikiwamo kupika, usafi wake, kupanga bajeti na kutunza mazingira.
Ujuzi huu humsaidia kuwa mtu anayejitegemea na baba anayejua kushiriki vema majukumu ya nyumbani.
Kwa kuwa malezi yanayomtayarisha mtoto kwa maisha halisi, humjengea misingi bora kwa familia yake ya baadaye.
Hivyo mtoto anayekuzwa katika mazingira yenye upendo, heshima na nidhamu huelewa thamani ya uhusiano na uwajibikaji.
Mara nyingi, watoto wa kiume huachwa waonekane “jasiri” na wasiohitaji msaada wa kihisia.
Hii inaweza kuathiri uwezo wao wa kuonyesha upendo na kujali katika familia zao za baadaye. Hivyo, aruhusiwe kuonyesha hisia zake bila kuhisi aibu na kumsaidia kushughulikia changamoto za kihisia kwa njia chanya kama atakuwanazo.
Lakini pia mtoto wa kiume anapaswa kufundishwa kuwajibika mapema kupitia kazi ndogondogo za nyumbani.
Jukumu lolote, hata kama ni dogo, linamfundisha umuhimu wa kujali na kutimiza majukumu yake.
Wakati mtoto anaposhinda changamoto ndogondogo, anajifunza jinsi ya kushughulikia majukumu makubwa ya kifamilia katika maisha yake ya baadaye. Elimu ni msingi wa maisha bora.
