Msimu huu wa sikukuu unahusu zawadi, kutoa na kupokea. Ikiwa umejipatia zawadi ya fedha au unapanga kujinunulia kitu cha thamani, ni wakati mwafaka kufikiria jinsi unavyoweza kutumia zawadi hii kwa njia yenye manufaa zaidi.
Mojawapo ya njia bora ni kuwekeza katika Hati Fungani ya Miundombinu ya Samia, mpango wa kipekee unaolenga kuharakisha maendeleo ya barabara nchini Tanzania. Mwaka huu nilishiriki kwenye timu ya Wataalamu iliyoshiriki kwenye kuangalia ufanisi wa hii hati fungani na nimeona ni wakati mwafaka wa kukushirikisha fursa hii.
Hati Fungani ya Miundombinu ya Samia, inayotolewa na Benki ya CRDB, inalenga kuwasaidia makandarasi wa ndani kwa mikopo ya gharama nafuu ili kufanikisha miradi ya ujenzi wa barabara za vijijini na mijini. Mpango huu unaendeshwa chini ya usimamizi wa Tarura (Wakala ya Usimamizi wa Barabara za Mijini na Vijijini).
Makandarasi hawa mara nyingi hukumbwa na changamoto za riba kubwa na masharti lukuki kutoka taasisi za kifedha, jambo ambalo huzuia kasi ya maendeleo ya miundombinu muhimu.
Kwa nini uwekeze kwenye hati fungani ya Samia?
Mosi. Faida ya Kifedha ya Uhakika: Hati fungani hii inatoa riba ya kuvutia ya asilimia 12 kwa kipindi cha miaka mitano. Ni uwekezaji salama unaotoa faida ya uhakika, tofauti na fursa nyingine zenye hatari kubwa.
Pili. Kuchangia Maendeleo ya Miundombinu: Kupitia fedha hizi, makandarasi wataweza kukamilisha miradi kwa wakati, ikiwemo barabara na madaraja. Barabara bora zitaharakisha usafirishaji wa mazao ya mkulima, wanafunzi kufika shuleni, na wagonjwa kufika hospitalini bila matatizo.
Tatu. Kuwawezesha makandarasi wa Ndani: Makandarasi wa ndani mara nyingi hukumbwa na vikwazo vya mikopo kutokana na riba kubwa na masharti magumu. Mpango huu unawawezesha kupata mikopo nafuu, hivyo kuboresha utendaji wao na kufanikisha miradi ya maendeleo.
Nne. Kukuza uchumi wa kila mwananchi: Miundombinu bora hupunguza gharama za usafirishaji, kuongeza faida kwa wakulima na wafanyabiashara, na kufungua fursa za uwekezaji na ujasiriamali. Hii ni njia ya moja kwa moja ya kuchangia ustawi wa uchumi wa taifa.
Tano. Usalama wa Uwekezaji: Hati fungani hii imetolewa na Benki ya CRDB, taasisi inayoaminika na benki imara na imeidhinishwa na Mamlaka ya Masoko ya Mitaji na Dhamana (CMSA). Usalama wa fedha zako umehakikishwa.
Uwekezaji katika Hati Fungani ya Samia ni rahisi. Tembelea tawi lolote la Benki ya CRDB au wakala wake kwa maelezo zaidi. Unaweza pia kushirikiana na mawakala wa soko la hisa. Mwisho wa kununua hati fungani hii ni tarehe 17 Januari 2025. Hati Fungani hii pia itaandikishwa kwenye soko la hisa la Dar es Salaam Februari 18, 2025 na itakuwa inatoa riba kwa kila robo ya mwaka. Usikose nafasi hii ya kipekee ya kuwekeza huku ukiunga mkono maendeleo ya taifa letu. Unaweza kuwekeza kama mtu binafsi, kampuni, kikundi ama taasisi.
Hii siyo tu fursa ya kifedha, bali pia mchango wako kwa ujenzi wa Tanzania yenye miundombinu bora kwa wote. Badala ya kufikiria tu kuhusu zawadi za sikukuu, fikiria jinsi uwekezaji huu utakavyokuwa zawadi ya kudumu kwa maisha yako na kwa taifa.
