Bodi ya Ligi Kuu Tanzania imetangaza kuwa baada ya michezo iliyofanyika Desemba 29, 2024 ligi hiyo itasimama hadi Machi mosi itakaporejea kwa mzunguko wa 17.
Bodi ya Ligi imetaja sababu ya kusimama kwa Ligi ni kupisha mashindano ya Mapinduzi Cup yatakayo anza Januari 3 visiwani Pemba na mashindano ya fainali za mataifa ya Afrika CHAN ambapo Tanzania ni mmoja wa nchi mwenyeji wa mashindano hayo.
Imeongeza kuwa kutokakana na changamoto hiyo Bodi imejipanga kuhakikisha msimu wa 2024/25 unafikia tamati kwa wakati kwa mujibu wa kanuni za Ligi hivyo kutoathiri kipindi cha mapumziko na maandalizi ya msimu wa 2025/26 ya klabu. Nakuongeza.
“BODI ya Ligi Kuu Tanzania (TPLB) inatangaza rasmi kuwa baada ya michezo ya Ligi Kuu ya NBC iliyofanyika Desemba 29, 2024, Ligi hiyo itasimama hadi Machi 1, 2025 itakaporejea kwa michezo ya mzunguko wa 17”.
“Sababu ya kusimama kwa Ligi hiyo ni kupisha michuano ya kuwania Kombe la Mapinduzi itakayofanyika kisiwani Pemba na Fainali za Mataifa ya Afrika kwa wachezaji wa ndani (CHAN), ambazo Tanzania ni moja ya wenyeji, jambo ambalo ni sehemu ya mafanikio katika mpira wetu yanayochochewa na ushirikiano mkubwa tunaoupata kutoka Serikali ya Jamhuri ya Muungano wa Tanzania, chini ya Mhe. Rais Dkt. Samia Suluhu Hassan”.
“Licha ya changamoto hiyo ambayo imeikumba ratiba ya Ligi Kuu ya NBC, Bodi imejipanga kuhakikisha msimu wa 2024/2025 unafika tamati kwa wakati kwa mujibu wa kanuni za Ligi, hivyo kutoathiri kipindi cha mapumziko na maandalizi ya msimu wa 2025/2026 kwa klabu zetu.
“Bodi ya Ligi Kuu Tanzania inaamini klabu zake zitatumia kipindi hiki kufanya marekebisho na maboresho katika vikosi vyake iii kuendana na ushindani mkubwa uliopo kwenye Ligi Kuu ya NBC msimu huu”.
Aidha Bodi inaitakia kila la kheri timu ya taifa ya Tanzania `Taifa Stars’ katika michuano hiyo huku pia ikiwatakia kheri ya mwaka mpya 2025 wadau wote wa mpira wa miguu zikiwemo klabu, mashabiki, wadhamini, vyama vya soka vya mikoa, vyama vishiriki na watanzania wote kwa ujumla.
