KOCHA wa JKT Tanzania, Hamad Ally amesema kuna kitu cha kujifunza kwa wachezaji chipukizi kupitia wakongwe John Bocco anayekipiga JKT, Erasto Nyoni (Namungo) na Kelvin Yondani (KenGold) namna ya kulinda vipaji kwa kucheza muda mrefu.
Wakongwe hao wana zaidi ya miaka 15 wakikiwasha Ligi Kuu Bara wakibebwa na namba wakiwaacha mbali wachezaji vijana wanaoibuka na kuzimika wakikosa nafasi za kucheza vikosi vya kwanza kutokana na kuwa na mambo mengi nje ya uwanja.
Hamad alisema wachezaji wanaopenda kulinda vipaji na kucheza muda mrefu ni lazima wajifunze kupitia wakongwe hao kama wanataka kufaidi matunda ya vipaji.
“Changamoto kwa wachezaji wengi vijana wakianza kupata mafanikio wanajiona wanajua kila kitu, wanakosa usikivu na utulivu mbaya zaidi hawajui wanataka kitu gani katika mpira wa miguu,” alisema Hamad.
“Wengi wanaamini nisipocheza timu hii nitaondoka kusaini sehemu nyingine wakisahau soka linahitaji nidhamu ya hali ya juu. Ni kweli wanaweza wakawa wanapata pesa za muda mfupi, ila ni tofauti na wengi kujitunza na kupambana wangevuna mamilioni na thamani zao zingekuwa juu.
“Mfano mzuri alichokifanya Mbwana Samatta katika mpira wa miguu kwa timu alizocheza nje kinatokana na kujitambua na kukubali kujifunza vitu vya mpira. Ndio maana jina lake lina heshima kubwa.”
Kwa upande wake, Nyoni alisema hakuna mafanikio yanayokuja bila kufanya bidii, hivyo wachezaji wanapaswa kupenda kazi wanayoifanya.
“Nidhamu ya soka haidanganyi mchezaji akijitunza na mazoezi matunda yake yataonekana uwanjani, hivyo maamuzi ni yao kama wanataka kufika mbali basi wazingatie soka linahitaji kitu gani,” alisema Nyoni, aliyeanza kucheza Ligi Kuu tangu 2008 kama ilivyo kwa Bocco ambaye ni mfungaji bora wa muda wote wa Ligi Kuu Bara wakati Yondani alianza kutamba Bara akiwa na Simba 2006.
Nyoni aliyeibuliwa na kituo cha Rolling Stone cha Arusha na kupita AFC Arusha kisha soka la kulipwa Vital’O ya Burundi na baadae Azam aliibukia Simba na sasa Namungo ndiye mchezaji anayeshika rekodi ya kucheza mechi nyingi za Stars akiitumikia mechi 107.
