Na Nasra Ismail Geita
Kufuatia mvua zinazoendelea kunyesha mkoani Geita radi imeua wanafunzi saba wa darasa moja katika shule ya sekondari Businda iliyopo wilayani Bukombe mkoani Geita.
Mkuu wa wilaya ya Bukombe Paskasi Muragiri amethibitisha kuwepo kwa vifo saba na majeruhi 82 ambao walikutwa na kadhia hiyo wakiwa darasani wakiendelea na masomo.
Aidha Muragiri ameongeza kuwa wanafunzi waliopoteza maisha wa kiume ni 6 na wa kike mmoja ambapo bado hajatambua majina yao huku katika majeruhi 82 wawili bado wana hali mbaya.
“Bado hatujawatambua waliopoteza maisha, lakini baadhi ya majeruhi tayari wameongea na kutuambia majina yao. Kadri hali inavyoendelea, tutapata taarifa rasmi,” ameongeza.
Mkuu huyo wa wilaya amesema kwamba, baada ya tukio hilo, madaktari walifika haraka shuleni hapo.
Hilo ni tukio la tatu kutokea mkoani Geita. Oktoba 18, 2019, wanafunzi 39 wa Shule ya Msingi Ihumilo, wilayani Geita, walijeruhiwa kwa kupigwa na radi, na Oktoba 17, 2018, wanafunzi sita wa Shule ya Msingi Emaco Vision walifariki dunia na wengine 23 kujeruhiwa kwa kupigwa na radi wakiwa darasani.
