Binti wa Rais wa zamani wa Afrika Kusini, Jacob Zuma, Duduzile Zuma-Sambudla, amekamatwa na kufikishwa mahakamani kujibu mashtaka ya ugaidi.
Anatuhumiwa kwa uchochezi wa vurugu kupitia machapisho yake kwenye mtandao wa kijamii wa X (zamani Twitter) wakati wa ghasia za Julai 2021 ambazo zilisababisha vifo vya zaidi ya watu 350.
Kwa mujibu wa taarifa za polisi, Zuma-Sambudla alijisalimisha kwa vyombo vya usalama asubuhi ya Alhamisi, tarehe 30 Januari 2025, ili kujibu mashtaka chini ya Sheria ya Kulinda Demokrasia ya Kikatiba dhidi ya Vitendo vya Kigaidi na Makosa yanayohusiana, pamoja na shtaka la uchochezi wa vurugu.
Msemaji wa polisi, Brigedia Thandi Mbambo, alisema, “Kukamatwa kwake ni matokeo ya uchunguzi wa kina uliofanywa na kitengo cha Uhalifu Mkubwa kilichopo Durban, kilichochunguza ghasia zilizoitikisa nchi mwaka 2021.”
Kesi dhidi ya Zuma-Sambudla inahusiana na machapisho yake katika mtandao wa X, ambayo inadaiwa yalihamasisha vurugu wakati wa ghasia hizo.
Hapo awali, alikabiliwa na shutuma kutoka kwa vyama vya Democratic Alliance (DA) na African National Congress (ANC) kwa madai ya kuchochea vurugu kupitia machapisho yake ya mtandaoni.
Duduzile Zuma-Sambudla ni mwanasiasa na mwanachama wa chama cha Umkhonto weSizwe Party (MKP).
Alianza kuhudumu kama Mbunge katika Bunge la Taifa la Afrika Kusini mnamo Juni 2024 na pia alichaguliwa kuwa Mwenyekiti wa Caucus ya Kusini ya Bunge la Pan-Afrika mnamo Novemba 2024.
Kukamatwa kwake kumekuja wakati ambapo alikuwa akihudumu katika nafasi muhimu za kisiasa, ikiwa ni pamoja na kuwa mjumbe wa kamati ya Bunge inayosimamia Mdhibiti na Mkaguzi Mkuu wa Hesabu za Serikali.
Bima pap
