Wakazi wengi wa mwambao wa Pwani aghalabu si wageni wa kuogelea.
Wakubwa kwa wadogo huwa ni wajuzi wa kuogelea, ikizingatiwa kuwa maeneo yao yamebahatika kupakana na Bahari Hindi.
Utawapata wakazi hapa wakitenga muda wao kila siku au wiki kufika baharini na kujivinjari kwa kuogelea.
Wale wanaoishi bara pia hutenga nafasi katika likizo zao kuzuru Pwani ili kujipata fursa ya kuogelea. Pia kuna waja wengine, iwe ni pwani au bara, ambao wamejijengea mabwawa yao ya kibinafsi ya kuogelea ilimradi wajifurahishe kuogelea.
Yaani kuogelea kwa wengi huzingatiwa kuwa ni suala la kujivinjari au kupitisha muda tu. Lakini je, wafahamu kwamba kuogelea kunasaidia kudumisha mwili wa ujana?
Wataalamu na washauri mbalimbali wa afya na saikolojia wanafichua kuwa uogeleaji ni jambo muhimu na lenye manufaa chungu nzima.
Miongoni mwa manufaa au faida hizo ni kuwaepusha watu dhidi ya kuzeeka haraka katika maisha yao.
Daktari na mtaalamu wa afya, Duncan Chai, anafafanua kwamba mazoezi ya mwili kwa jumla huwa ni mazuri.
Dk Chai anataja uogeleaji kuwa miongoni mwa njia bora zaidi za mazoezi kwa mwili wote wa binadamu na hata mfumo wa moyo na mishipa.
Anaeleza kuwa kadri binadamu anavyozeeka, mifupa huwa inapungua kiuzito, jambo ambalo linaifanya kuwa dhaifu zaidi na kukabiliwa na uwezekano mkubwa wa kuvunjika.
Anaweka wazi kuwa punde mtu anapotinga umri wa miaka 35 hivi, huanza kupoteza asilimia karibu 0.5 ya ukubwa wa mifupa karibu kila mwaka.
Anasema ni kupitia kupungua huko kwa uzito ambapo huongezeka zaidi, hasa kwa wanawake wanapofikia umri wa kutoweza kuzaa na kwa upande wa wanaume, baada ya kuwa na umri wa miaka kama 50.
Dk Chai anaendelea kufafanua kuwa ingawa madini ya calcium na vitamini D hufahamika kuwa muhimu kwa afya ya mifupa ya binadamu, tafiti nyingi zimeonyesha kuwa mazoezi kama vile uogeleaji yanaweza kupunguza hali hiyo.
“Watu wapende kuogelea. Kuna utamu wake, hasa kwa wale ambao hawapendi kuzeeka haraka katika haya maisha. Mazoezi, ikiwemo kuogelea huzuia kupungua kwa uzito wa mifupa na udhaifu wake kunakotokana na umri mkubwa. Unapokuwa na hulka ya kuogelea itamaanisha hata iwapo umri wako unasonga, bado utasalia kuwa na mifupa mizito na imara, hivyo kudumisha ujana wako tu,” anasema na kuongeza:
“Mazoezi yanaaminika kusaidia kuitunza mifupa yetu. Huifanya kuwa imara kwa kuiweka katika shinikizo la mazoezi. Sisi wataalamu wa afya tunaamini kuwa kila msukumo au shinikizo kwa mfupa wakati wa mazoezi, hutuma taarifa kwenye seli za mifupa na hivyo kuifanya iwe imara tena.”
Naye daktari na mtaalamu wa mifupa, Loice Midze, anasema mbali na kudhibiti ujana, kuogelea pia kuna faida nyingine chungu nzima.
Dk Midze anasema mazoezi, ikiwemo uogeleaji mara nyingi huifanya mifupa kupeleka taarifa kwa misuli ya mwili ambayo kama imeimarika ipasavyo, husaidia pia kuimarika kwa ujenzi wa mifupa kwa jumla.
Anasisitiza kuwa mbali na mifupa, mazoezi pia huwa ni mazuri kwa moyo, mapafu na ubongo.
Analinganisha kuogelea na mazoezi mengine kama vile kukimbia, ambapo huwezesha kalori nyingi kuungua, hivyo kumwacha mtu na siha njema.
“Mojawapo ya faida kubwa za kuogelea ni kwamba hufanya kazi kwa mwili wako wote kuanzia juu kichwani hadi kwenye vidole. Pia huongeza mapigo ya moyo wako bila wewe kujitutumua kupita kiasi. Ni kupitia uogeleaji ambapo pia misuli hujengwa, kukupa nguvu na hata kujenga ustahimilivu hata zaidi,” anasema Dk Midze.
Anasisitiza kuwa wakati misuli ya mja inapopata mazoezi mazuri, mfumo wake wa moyo na mishipa pia huwa mzuri.
“Kuogelea hufanya moyo wako na mapafu kuwa na nguvu. Kuogelea ni kuzuri. Hii ndiyo sababu waogeleaji huwa wana takriban nusu ya hatari ya kifo wakilinganishwa na wasioogelea. Kuogelea kunaweza kusaidia kupunguza shinikizo la damu,” anasema.
Kuogelea muhimu kwa watu hawa
Wataalamu wa afya pia wanasema kuogelea ni muhimu, hasa kwa watu walio na majeraha au maradhi mbalimbali kama vile ugonjwa wa yabisi na hali nyingine za afya kuzorota.
Kuogelea ni chaguo bora la mazoezi kwani husaidia binadamu kupunguza baadhi ya maumivu au kuboresha unafuu wa jeraha.
Watalamu wanasema watu walio na ‘osteoarthritis’ wanaweza kupunguza kwa kiasi kikubwa maumivu ya viungo na ugumu ikiwa watajihimu katika uogeleaji.
Kwa upande wake, mwanasaikolojia, Andrew Masama, anataja faida nyingine za kuogelea, akisema huwa ni mbinu bora ya kuwasaidia watu waweze kulala vizuri usiku.
Anafafanua kuwa ikiwa watu hawapendi kufanya mazoezi mengine kama vile kukimbia, wanaweza kufanya mazoezi ya kuogelea kuwa chaguo zuri, hasa ikiwa wanatafuta kuboresha usingizi wao.
“Najua msongo wa mawazo umeathiri wengi hadi kufikia wengine kukosa usingizi. Jitose katika kuogelea. Ni dhahiri kabisa kwamba watu wazima wenye tatizo la kukosa usingizi, wanaweza kuchagua kuogelea mara kwa mara kama mazoezi yao. Uogeleaji ni tiba ya shida hiyo. Kuogelea hufanya ubora wa maisha na usingizi huimarika,’’ anaeleza.