Takriban watu 25 wamefariki katika wimbi jipya la mashambulizi ya Urusi nchini Ukraine, maafisa wa Ukraine wameripoti, huku mzozo huo ukiendelea bila dalili za kumalizika.
Katika Mkoa wa Donetsk, shambulio moja liliua watu 11 na kujeruhi wengine 40, wakiwemo watoto sita, maafisa wa eneo hilo walitangaza Jumamosi. Nyumba na miundombinu pia zililengwa katika mikoa mingine, ikiwemo Kharkiv na Odesa.
Mashambulizi haya yameongezeka baada ya Marekani kusitisha msaada wake wa kijeshi na ushirikiano wa kijasusi na Kyiv, hali iliyojiri kufuatia mvutano wa kisiasa kati ya Rais Donald Trump na Rais Volodymyr Zelensky wa Ukraine.
Baada ya mashambulizi haya, Waziri Mkuu wa Poland Donald Tusk alionya juu ya athari za kuyapa nafasi matakwa ya Urusi, akisema: “Hivi ndivyo hutokea mtu anapowafurahisha wapuuzi. Mabomu zaidi, uchokozi zaidi, waathirika zaidi.”
Shambulio baya zaidi lilitokea Ijumaa jioni katika mji wa Dobropillya, Donetsk, ambapo makombora mawili ya balistiki yaliharibu majengo manane ya makazi na kituo cha maduka, na kusababisha vifo vya watu 11.
Baada ya waokoaji kufika eneo la tukio, Urusi ilishambulia tena kwa makusudi, alisema Rais Zelensky kupitia Telegram. “Mashambulizi haya yanaonyesha kuwa malengo ya Urusi hayajabadilika,” aliongeza.
Wakati huohuo, Ukraine nayo imeendelea kulenga maeneo ya Urusi, huku Wizara ya Ulinzi ya Moscow ikitangaza kuwa vikosi vyake vimeangusha ndege 31 zisizo na rubani za Ukraine usiku kucha.
Katika mazungumzo na waandishi wa habari Ijumaa, Rais Trump alisema kuwa “inaweza kuwa rahisi kuendeleza majadiliano na Moscow kuliko Kyiv”, akionyesha ugumu wake wa kushawishi pande zote kufikia amani.
