Biashara ni nguzo muhimu ya maisha kwa wengi, hasa wafanyabiashara wadogo wanaotegemea juhudi zao za kila siku ili kujenga maisha bora. Ili kuanzisha na kuendesha biashara kwa ufanisi, mtaji ndio msingi muhimu.
Mtaji unaweza kuwa ni fedha au rasilimali zinazohitajika kuanzisha na kuendesha shughuli za kibiashara. Kujua jinsi ya kukadiria mtaji wa biashara yako ili iwe na maisha marefu na faida ni jambo muhimu sana. Biashara nyingi zinakufa kutokana na kutokuwa na mtaji wa kutosha.
Mtaji unaweza kukusaidia kumudu gharama na kutekeleza ndoto yako ya biashara. Biashara ni faida na hasara na ukipata faida mtaji unaongezeka, ukipata hasara mtaji unapungua. Unapokuwa na mtaji kidogo unaweza kufilisika iwapo utapata hasara.
Ukadiriaji wa mtaji utakufanya utambue pia chanzo na gharama za mtaji wako. Ikiwa wewe ni mfanyabiashara mdogo au unatamani kuanzisha biashara, hatua hizi zinaweza kukusaidia kuweza kukadiria mtaji wa biashara yako na kukuwezesha kuwa na mafanikio.
Kwanza, tambua aina ya biashara unavyotaka kufanya. Unapaswa kuanza kwa kutambua aina ya biashara unayoifanya je, ni duka la mboga, saluni, au labda uuzaji wa nguo? Kila biashara ina mahitaji yake tofauti. Ni muhimu kufanya utafiti wa biashara ambayo unataka kuifanya ili kujua aina na idadi ya wateja na mahitaji yao. Ni vizuri kujua mteja wako ni nani na anahitaji nini kwa wakati gani.
Pili, angalia matakwa ya kisheria yanayohusu biashara yako. Mara nyingi biashara zinaweza kuwa na mahitaji ya kisheria kuhusiana na usajili, mtaji au namna ya kuendesha biashara yako. Hivyo ni muhimu kujua kuwa ili kukidhi matakwa ya kisheria ni lazima kutenga fedha za kutosha. Mathalani, biashara ya viwanda vya vyakula inapaswa kuwa na vifaa mbalimbali vya kiafya na usalama, pia kuwa na wafanyakazi wenye fani husika na vyote vinaweza kuwa ni gharama kwenye mtaji.
Tatu, andika gharama za awali. Gharama za awali kama kodi ya pango, matengenezo, ununuzi wa bidhaa, na vifaa vya kazi kama meza, mashine ama vifaa vya ofisi ni muhimu kuainishwa na kukadiriwa.
Nne, kadiria gharama za uendeshaji. Kila biashara ina gharama za kuiendesha biashara na kabla hujaanza biashara ni vizuri kukadiria pia matumizi ya kila siku na ya kila mwezi kwa kipindi cha walau miezi mitatu mpaka sita kama sehemu ya mtaji wako.
Mfano mishahara ya wafanyakazi, umeme, maji na usafiri wa bidhaa. Ni vizuri kufanya utafiti wa kila gharama. Gharama za uendeshaji zinaweza kutokana na utafiti wa uendeshaji wa biashara kama ambayo unataka kuifanya.
Tano, Fikiria chanzo cha mtaji wako. Chanzo kinaweza kuwa ni akiba (angalia kama akiba yako itatosha), mkopo wa benki ama taasisi nyingine za fedha, au msaada kutoka wazazi au ndugu.
Ni vizuri kuangalia pia gharama za mtaji na masharti yake kama unaweza kuyatekeleza bila kuathiri biashara yako kwa muda ujao.
Ni vizuri kuelewa kuwa mafanikio ya biashara yanatokana na mpango mzuri wa mtaji ambao utasaidia kuwezesha kuwa na biashara endelevu. Ukosefu wa mtaji wa kutosha ni mmojawapo ya sababu za biashara nyingi kutoweka miezi michache baada ya kuanzisha. Hatua za kukadiria mtaji ni hatua muhimu sana kwenye biashara ndogondogo.
