Wakati Moscow ikizingatia usitishwaji wa vita kwa muda, vikosi vyake vya kijeshi vinaendelea kupambana katika mstari wa mbele.
Majadiliano ya kidiplomasia yanaweza kuwa magumu na yenye mwendo wa polepole, lakini katika uwanja wa vita, athari zake hupimwa kwa maisha yaliyopotea.
Katika hospitali ya kijeshi mashariki mwa Ukraine, majeruhi wanaendelea kuwasili kwa wingi kwa magari ya wagonjwa. Hali hii inaonyesha utofauti mkubwa kati ya diplomasia inayofanyika mbali na uwanja wa vita na ukatili halisi wa mapigano, ambapo miili inaendelea kupasuliwa, kukatwa vipande, na kuharibiwa na mabomu na risasi.
Takriban askari ishirini wa Ukraine waliokuwa majeruhi walipakiwa kwenye basi maalum kuelekea hospitali ya Dnipro. Wengine walitembea wakiwa na majeraha madogo, huku baadhi wakibebwa kwenye machela. Basi hilo limeundwa kwa vifaa vya matibabu maalum ili kufuatilia hali ya majeruhi wanapohamishwa kwa mwendo wa kasi kwenye barabara zenye vikwazo.
Wengi wa waliokuwa ndani ya basi walikuwa na majeraha ya vipande vya risasi, huku chanzo kikuu cha majeraha hayo kikiwa silaha zinazotumika kwa wingi na kwa athari kubwa katika mstari wa mbele.
Hakuna hata mmoja wa askari tuliowahoji anayeamini kwamba vita hivi vitakwisha hivi karibuni. Maksym, mwenye umri wa miaka 30, akiwa kwenye machela na akipokea dawa za kupunguza maumivu, anasema amesikia kuhusu pendekezo la kusitisha mapigano kwa siku 30. Hata hivyo, anaongeza kwa msisitizo: “Ninamchukulia Putin kama muuaji, na wauaji hawakubali makubaliano kirahisi.”
