Mtaji ni kitu cha thamani sana kwa biashara yoyote. Ni msingi ambao biashara husimama na kukua, hivyo kulindwa kwake ni jambo la lazima. Mtaji unaweza kupatikana kwa njia mbalimbali, ikiwa ni pamoja na mkopo. Hata hivyo, mtaji unaweza kupungua au kupoteza.
Ikiwa umekopa na mtaji ukapotea, unaweza kupoteza dhamana na imani ya kukopesheka tena, hali inayoweza kuathiri maendeleo ya biashara yako.
Aidha, mtaji unakua kwa kupata faida, lakini pia unaweza kupotea kwa sababu kama wizi, kuharibika kwa mali, au mauzo dhaifu yanayopelekea hasara. Kwa hiyo, ni muhimu kuweka mikakati madhubuti ya kuuhifadhi na kuhakikisha kila mara kuwa mtaji wako haupotei, au haushuki thamani.
Kama vile vitu vya thamani vinavyolindwa kama vile kuweka walinzi dukani, mtaji wa biashara unahitaji ulinzi wa hali ya juu. Vitu vya thamani pia hulindwa kwa bima ambayo hutoa kinga dhidi ya majanga yanayoweza kusababisha hasara.
Hivyo, kulinda mtaji si chaguo, bali ni wajibu kwa kila mjasiriamali anayetaka kufanikisha biashara yake. Kuna mambo matano ya msingi ambayo yanaweza kukusaidia kulinda mtaji wako wa biashara:
Kwanza, hakikisha unafanya biashara kwa faida. Hili linaweza kufanikishwa kwa kuuza bidhaa mojamoja kwa faida ndogo au kuongeza idadi ya wateja wako ili mapato ya jumla yaongezeke.
Faida ni nguzo ya kuimarisha mtaji wako. Biashara ni faida na pia ni hasara, mara nyingi ni faida kuliko hasara. Usikubali kupata hasara.
Pili, Jenga uwezo wa kuendesha biashara na kuzungusha mtaji. Katika biashara, hasa ndogo, mtaji unaweza kuzunguka mara kadhaa kwa kununua na kuuza bidhaa kwa haraka.
Ni vizuri kuweka mahesabu ya fedha na kuangalia umezungusha mara ngapi mtaji wako. Uelewa huu wa kuzungusha mtaji unasaidia kuongeza thamani yake.
Kwa mfano, iwapo umewekeza kwenye basi la abiria, litaweza kufanya biashara likiwa linasafirisha abiria, gari la mizigo likiwa linatoa huduma hiyo na siyo kupaki nyumbani au barabarani.
Hivyo iwapo umewekeza kwenye biashara, huna budi kuhakikisha biashara inafanya kazi, na hivyo kutokufanya mtaji uliowekeza kuwa umekaa bure.
Tatu, weka bima. Unaweza kuweka bima kwa mali zako au vifaa vya biashara ili, iwapo vitaharibika au vitapotea kutokana na majanga kama ajali, moto au mafuriko, uweze kufidiwa na kupata nafuu ya kuirudisha sehemu ya mtaji wako.
Hakuna mtaji mdogo, hivyo usisubiri uwe na mtaji mkubwa ndio ufikirie kukata bima.
Nne, epuka kukopesha. Ni bora kuuza bidhaa kwa fedha taslimu badala ya kutoa mkopo kwa wateja.
Kukopesha ni taaluma ambayo kuna utaalamu wa kukopesha, na biashara za kukopesha zina leseni za kufanya biashara hiyo. Kukopesha kwenye biashara mara nyingi husababisha upotevu wa mtaji ikiwa wateja watashindwa kulipa deni kwa wakati.
Tano, pata thamani ya fedha unayotumia unaponunua bidhaa au mali za biashara. Unaponunua, hakikisha unapata bidhaa zenye thamani inayolingana na pesa ulizotoa. Kununua mali isiyo na thamani kunaweza kukuletea hasara na kupunguza mtaji wako.
Kumbuka kuwa mtaji ni hazina ya biashara ambayo inapaswa kulindwa kwa kila hali. Kwa kutumia mikakati kama hii, utaweza kuuhifadhi na hata kuukuza, na hivyo kuhakikisha maendeleo endelevu ya biashara yako.
Biashara yenye mtaji uliolindwa vizuri ni kama nyumba yenye msingi imara—itaweza kustahimili changamoto zozote.
