“Tunaendelea kutoa wito wa utulivu na kujizuia na kuzitaka pande zote kuheshimu haki ya kukusanyika na kujieleza kwa amani,” Farhan Haq, Naibu Msemaji wa Umoja wa Mataifa aliambia mkutano huo wa kila siku kwenye Makao Makuu ya Umoja wa Mataifa mjini New York.
“Tunaviomba vyombo vya usalama kuwalinda walio nje ya barabara huko Dhaka na miji mingine ya Bangladesh,” aliongeza.
Pia alisisitiza umuhimu wa kipindi cha mpito cha amani, utulivu na kidemokrasia, na kuongeza kuwa Umoja wa Mataifa unasimama kwa mshikamano kamili na watu wa Bangladesh kwa wakati huu.
“Tunatoa wito wa kuheshimiwa kikamilifu kwa haki zao za kidemokrasia na za kibinadamu,” alisema, akibainisha pia haja ya uchunguzi kamili, huru, usio na upendeleo na wa uwazi katika vitendo vyote vya unyanyasaji.
Zaidi ya watu 300, wakiwemo watoto wengi, wanasemekana kuuawa tangu maandamano yaliyoongozwa na wanafunzi kuzuka, na zaidi ya 20,000 kujeruhiwa. Umwagaji damu huo ulikuwa miongoni mwa matukio mabaya zaidi kuwahi kushuhudiwa nchini Bangladesh.
Machafuko hayo yalianza mwezi Julai kwa maandamano ya wanafunzi dhidi ya mgawo wa kazi za utumishi wa umma. Ingawa mpango huo uliondolewa, maandamano yalizuka tena wiki iliyopita, na kutaka Waziri Mkuu Sheikh Hasina ajiuzulu na wale waliohusika na ukandamizaji mkali wa maandamano kuwajibika.
Bi Hasina amekuwa mamlakani tangu Januari 2009, akiwa ameongoza nchi hiyo hapo awali kutoka 1996 hadi 2001.
Ripoti za vyombo vya habari zinaonyesha kuondoka kwake kutoka Bangladesh kulikumbwa na shangwe nyingi kote nchini humo.
Pia kulikuwa na taarifa za kuvamiwa na kuchomwa moto katika makazi ya Waziri Mkuu; jumba la makumbusho la kumbukumbu ya Rais wa kwanza wa nchi na babake Bi Hasina, Sheikh Mujibur Rahman; na nyumba za maafisa wakuu wa serikali.
Mkuu wa jeshi la Bangladesh alitangaza katika hotuba ya taifa iliyoonyeshwa na televisheni kufuatia kuondoka kwake kwamba serikali ya mpito itaundwa, ingawa hakuna maelezo zaidi yaliyotolewa.
