Katika kipindi cha maendeleo ya awali ya mtoto, elimu kwa watoto wadogo wenye umri wa miaka 0-2 ni muhimu.
Katika hatua hii, mtoto anajenga misingi ya kukua kihisia, kujenga lugha, na kujiendeleza kijamii, ambapo mara nyingi stadi hizi hupatikana katika mazingira ya nyumbani chini ya usimamizi wa wazazi na walezi.
Hata hivyo, ukatili dhidi ya watoto umekuwa changamoto kubwa inayohitaji kushughulikiwa kwa umakini mkubwa.
Ukatili huu unahusisha aina mbalimbali, kama vile kisaikolojia, kihisia, kimwili, na kijamii, na umekuwa ukiathiri watoto kwa njia nyingi.
Athari za ukatili kwa watoto ni kubwa na madhara yake ya muda mrefu ni makubwa.
Watoto wanaokumbwa na ukatili wanaweza kupata matatizo ya kisaikolojia kama vile sonona, wasiwasi, na msongo wa mawazo.
Kimwili, wanaweza kuathirika kwa kuwa na majeraha na magonjwa yasiyopona, na hivyo kuchangia ukuaji na ustawi wao kudorora.
Kwa hali hii, wazazi wengi hivi karibuni wameamua kuwapeleka watoto wao kwenye vituo vya malezi, maarufu kama Day Care Centres, ambayo vimeenea sana hasa maeneo ya mijini.
Hali hii imechochewa na hofu ya kuwaacha watoto wao mikononi mwa waangalizi wa nyumbani ambao mara nyingi wamekuwa wakileta taharuki kwa vitendo vya ukatili.
Kwa hivyo vituo vya kulelea watoto vimekua na wateja wa kutosha kwani wazazi wanaofanya kazi za kuajiriwa au kujiajiri mijini wamekuwa na kibarua kizito kuwalea watoto wao huku hofu ya kuajili mabinti wa kazi ikiwa ni sababu kubwa ya kuamua kuwapeleka watoto wao kwenye vituo vya kulelea watoto.
Kwa mujibu wa kanuni, mtu hawezi kuendesha kituo cha kulea watoto wadogo isipokuwa kama anamiliki cheti halali cha usajili.
Kwa hivyo, ni muhimu kwa wale wanaotaka kuanzisha vituo hivi kufuata taratibu za usajili ili kuepuka makosa.
Utaratibu wa kusajili kituo cha kulelea watoto unaendana na Sheria ya Mtoto ya Mwaka 2009, pamoja na kanuni za vituo vya kulea watoto wadogo mchana na watoto wachanga za mwaka 2012.
Eneo ambapo kituo kitajengwa litatakiwa kukaguliwa na ofisa afya wa eneo husika na kutoa ripoti ya kuridhisha kuwa panafaa kwa ajili ya kulelea watoto. Hii ni kwa mujibu wa kanuni ya 4(3).
Kwa mujibu wa kanuni hizo, kama eneo/jengo ambapo utaendeshea kituo ni la kupanga, hakikisha una mkataba wa pango ambao hauko chini ya miaka mitatu (Kanuni ya 4(4)).
Mmiliki wa kituo anatakiwa kuthibitisha uwezo wa kifedha kuwa unaweza kuendesha kituo na kuhakikisha eneo lina vifaa vya kutosha kwa ajili ya michezo ya watoto. Uthibitisho huu ni muhimu kwa mujibu wa kifungu cha 47(1).
Ingawa vituo hivi vinavyohusisha malezi ya watoto vimekua na wateja wa kutosha, bado kuna changamoto katika kuhakikisha usalama na ustawi wa watoto wanaohudumiwa.
Katika ulimwengu wa sasa, wazazi wanakabiliwa na changamoto ya kutafuta vituo vya kulelea watoto mchana ambavyo ni salama na vinavyotunza watoto wao kwa uangalifu mkubwa.
Wasiwasi huu unachochewa na hadithi za uzembe, vituo vilivyojaa kupita kiasi, na ukosefu wa hatua za usalama.
Ni muhimu sana kwamba vituo vya kulelea watoto mchana viwe mahali ambapo watoto wanatunzwa na kulindwa, na wazazi wawe na uhakika kuwa watoto wao wapo salama.
Vituo vya kulelea watoto vinapaswa kuzingatia kanuni za usalama ili kujenga imani ya wazazi.
Hii inajumuisha kuimarisha milango na njia za kuingia, kuhakikisha maeneo ya michezo yako salama, na kuwafunza wafanyakazi mbinu za awali za msaada na jinsi ya kukabiliana na dharura.
Pia, usalama wa kihisia ni muhimu. Walezi wanapaswa kuwa makini, wenye huruma, na wawe na uwezo wa kujali kila mtoto kwa ukaribu.
Ustawi wa kihisia wa watoto unapaswa kuwa kipaumbele sawa na usalama wa kimwili.
Kwa wazazi, uamuzi wa kumwacha mtoto wao kwenye kituo cha kulelea ni mgumu.
Kituo chenye uwazi kinachowasiliana mara kwa mara na wazazi kuhusu maendeleo ya watoto wao kinasaidia kupunguza hofu hii.
Teknolojia pia imekuwa msaada mkubwa; baadhi ya vituo vinatoa video za moja kwa moja au picha za watoto wanaofanya shughuli zao ili kuhakikisha wazazi wanajua kinachoendelea.
Kituo cha kulelea watoto kinapaswa kuwa mahali ambapo mtoto anaweza kuwa na uhakika wa usalama na ustawi.
Wazazi wanahitaji kupewa taarifa zote muhimu kuhusu usalama na maendeleo ya watoto wao.
Kutoa mazingira ya kulelea watoto yenye usalama wa hali ya juu ni jukumu linalohitaji umakini mkubwa, ushirikiano, na umakini wa mara kwa mara ili kuhakikisha kwamba watoto wanaweza kukua katika mazingira ya furaha na usalama.
Mazingira yenye msisimko na yenye utajiri wa mafunzo yanayopatikana katika vituo hivi yanaweza kusaidia kukuza vipengele mbalimbali vya ukuaji wa mtoto kwa ufanisi zaidi kuliko malezi ya nyumbani.
Kama una maoni kuhusu habari hii tuandikie kupitia Whatsapp 0765864917.
