KambiTiba ya Madaktari wa Tanzania Comoro yaanza kwa kishindo

KambiTiba ya Madaktari Bingwa toka Tanzania nchini Comoro imeanza kwa muitikio mkubwa wa wananchi wa nchini humo ambapo mamia wamejitokeza kupata huduma mbali mbali zinazotolewa kwa ushirikiano na madakatari wazawa katika Kisiwa cha Ngazidja.

Madaktari hao wa Tanzani wametoa huduma za uchunguzi na matibabu katika matatizo ya mifupa,figo na vibofu vya mkojo,mifupa,saratani,moyo na mengineyo ambapo takriban wagonjwa 417 wameandikishwa katika siku ya kwanza.

Akizungumza katika kikao cha tathmini ya uendeshaji wa kambi hiyo inayoratibiwa Ubalozi wa Tanzania nchini Comoro na Taasisi ya Moyo ya Jakaya Kikwete,Kaimu Mkuu wa Msafara,Dkt Salehe Mwinchete ameeleza kuwa ushirikiano waliopewa na madaktari wenyeji ni mkubwa na wananchi wa Comoro wamejitokeza kwa wingi na hilo limewatia moyo kuwa siku zinazofuata hali itakuwa bora zaidi.

Kwa upande wake,Balozi wa Tanzania nchini Comoro aliwaaeleza madaktari hao kuwa KambiTiba hiyo imekuwa kivutio kikubwa na wananchi wengi wana imani kuwa katika Kambi zijazi fani nyingine za afya zitaingizwa.

Kambi hiyo itakayohitimishwa tarehe 4 Desemba,2024,inashirikisha madaktari bingwa kutoka Taasisi ya Moyo ya Jakaya Kikwete,hospitali za Benjamin Mkapa na Muhimbili,Taasisi ya Saratani ya Ocean Road na Taasisi ya Mifupa ya Muhimbili.