Mitandao ya kijamii imekuwa jukwaa muhimu la kushiriki taarifa na kujifunza. Licha ya faida zake, mitandao hii pia imekuwa chanzo kikubwa cha usambazaji wa taarifa potofu.
Hili linawahusu hasa watu wenye kisukari, ambao wana hatari ya kuathirika kutokana na habari zisizo za kweli zinazozungumzwa mtandaoni.
Taarifa potofu kuhusu kisukari zinaweza kuwa na madhara makubwa kwa afya ya wagonjwa, kwa sababu zinaweza kuathiri namna wanavyodhibiti hali yao ya afya na kuchangia katika ongezeko la matatizo ya kiafya.
Mitandao ya kijamii imejaa habari kuhusu tiba na virutubisho visivyo na ufanisi vya kudhibiti kisukari.
Watu wenye kisukari wanaweza kuona matangazo ya vidonge, majimaji au virutubisho vinavyodai kuwa suluhisho la haraka kwa kutibu kisukari, wengi wao hawana uthibitisho wa kisayansi kuhusu ufanisi wao.
Wakati mwingine, matumizi ya virutubisho hivi yanaweza kuathiri kwa njia mbaya matumizi ya dawa zinazohitajika kudhibiti kiwango cha sukari mwilini na kusababisha matatizo makubwa ya kiafya.
Watu wenye kisukari wanaotafuta suluhisho mtandaoni huwa wanadhani kuwa wamepata tiba bora kuliko ile inayotolewa na wataalamu wa afya.
Hii inaweza kuwaweka kwenye hatari ya kuacha kutumia dawa na matibabu ya kisukari.
Hali hii inaweza kusababisha vidonda, matatizo ya figo, kuathiri mzunguko wa damu, au hata kupoteza maisha.
Watu wengi huamini shuhuda za watu wengine mtandaoni, badala ya kuzingatia ushauri wa daktari mwenye ujuzi na uzoefu katika udhibiti wa ugonjwa wa kisukari.
Hata hivyo, baadhi ya mapendekezo haya ni potofu.
Kwa mfano, watu wanaweza kuambiwa kuwa vyakula fulani vya asili au lishe maalumu zinaweza kurudisha hali ya kisukari kuwa ya kawaida.
Hali hii inaweza kuwafanya wenye kisukari kutofuata miongozo ya kitaalamu ya lishe na hivyo kuathiri udhibiti wa viwango vya sukari mwilini.
Habari za mitandao ya kijamii mara nyingi hazina uhalisia na zinaweza kuwa na mapungufu makubwa katika utoaji wa taarifa.
Wengi wa watu wenye kisukari wanaposhiriki kwenye vikundi vya mtandaoni, wanakutana na ushauri wa watu wasio na ujuzi wa matibabu. Hii inawaweka katika hatari ya kupata taarifa potofu kuhusu namna ya kuishi na kisukari.
Wenye kisukari wanapaswa kuwa waangalifu wanapotumia mitandao ya kijamii kama chanzo cha habari kuhusu hali zao za kiafya.
Ingawa mitandao inaweza kuwa na manufaa katika kushirikiana uzoefu, ni muhimu zaidi kufuata ushauri wa wataalamu wa afya na kujua ukweli kuhusu kisukari au kumfuatilia mwenye mafunzo na elimu sawa na wataalamu wa afya.
