WAKATI Watanzania wakiendelea kulipigia hesabu ndefu kundi la Taifa Stars katika michuano ya AFCON 2025, kaimu kocha mkuu wa timu hiyo, Hemed Seleman ‘Morocco’ ametoa mtazamo wake na namna watakavyokiandaa kikosi kwenda kushindana na sio kushiriki pekee.
Katika michuano hiyo itakayoanza Desemba 21, 2025 hadi Januari 18, 2026 nchini Morocco, Taifa Stars imepangwa kundi C na timu za Nigeria, Tunisia na Uganda.
Kocha huyo alisema hakuna kundi gumu kwenye droo hiyo aliyoishuhudia ikipangwa nchini Morocco jana Jumatatu Januari 27, 2025 akiwa na msaidizi wake Jamhuri Kihwelo ‘Julio’ sambamba na viongozi na maofisa wengine wa Shirikisho la Soka Tanzania (TFF) wakiongozwa na Rais Wallace Karia na makamu wake Athuman Nyamlani.
Morocco amesema Watanzania hawatakiwi kuogopa kwani Stars nayo inahitaji kuheshimiwa na mataifa mengine kwa kuwa imeshatoka kwenye unyonge wa miaka ya nyuma.
“Kwangu mimi sijaona kundi rahisi likiwemo hili letu, yote ni magumu, Tanzania sio wanyonge, nipo hapa Morocco na makocha mbalimbali ukijitambulisha unatoka Tanzania wanaheshimu sana na hata baada ya droo unaona washindani wetu wanatafakari kwa kina,” amesema Morocco na kuongeza.
“Tanzania imeshatoka kwenye enzi za unyonge, tunatakiwa tujiamini kama Taifa kwamba tunaweza kufanya kikubwa, miaka ya nyuma tulikuwa tunakuja kama wasindikizaji, fainali zilizopita tukafanikiwa kupata pointi kwenye makundi, safari hii tunataka kuja kushindana kutafuta nafasi mbili za juu kwenda mbali.”
Kocha huyo ameongeza kuwa kundi hilo lina timu zenye mchanganyiko ambapo sasa wanarudi kuanza mikakati ya kina kuhakikisha wanafikia malengo.
“Ukilitazama kundi letu kuna timu za Afrika Magharibi, Afrika Kaskazini na sisi Afrika Mashariki tukiwa na majirani zetu Uganda, kitu muhimu hapa ni kuanza kujipanga, sisi makocha tutakuwa na majukumu yetu kuwajua kiundani wapinzani wetu wote.
“Ukiacha hilo tutakuwa na vikao vya maandalizi tukiwa na viongozi wa TFF na Serikali, kitu kikubwa hapa tunatakiwa kufanya maandalizi mazuri ya timu yetu kabla ya kwenda kushindana kwenye hizo fainali, haya yote yakifanyika kwa kiwango kikubwa hakuna kinachoshindikana kwetu,” amesema kocha huyo.
Stars inakwenda kushiriki Afcon 2025 kwa mara ya nne baada ya kufanya hivyo mwaka 1980 (Nigeria), 2019 (Misri) na 2023 (Ivory Coast).
Katika Afcon ya 2019, ndiyo pekee ambayo Stars iliondoka bila ya pointi lakini 1980 ilipata pointi moja na 2023 pointi 2 ingawa mara zote imeishia hatua ya makundi.
