Katika hali isiyo ya kawaida mama mzazi wa aliyekuwa mmiliki na mkurugenzi wa Kituo cha Michezo cha Alliance kilichopo jijini Mwanza, James Bwire, aliyefariki dunia Januari 25, 2025 naye amefariki.
Akizungumza na Mwananchi Digital leo Ijumaa, Januari 31,2025, Mwenyekiti wa Kituo cha Alliance, Stephano Nyaitati amethibitisha kifo cha mama mzazi wa Bwire aitwaye Nchagwa Manga.
Nyaitati amesema mama huyo amefariki asubuhi ya leo, Ijumaa, akipatiwa matibabu katika Hospitali ya Rufaa ya Kanda ya Bugando, saa chache kabla ya kufanyika ibada ya kuagwa mwili wa mtoto wake.
Bwire alifariki dunia Januari 25, mwaka huu saa 4 usiku wakati akipatiwa matibabu katika Hospitali ya Bugando Mwanza baada ya kuugua ugonjwa wa kiharusi kwa muda mrefu.
“Huyu (mama mzazi wa marehemu James Bwire) alikuwa anaumwa kwa muda mrefu na alikuwa na kliniki yake ya matibabu kutokana na changamoto ya moyo ambao ulikuwa umepanuka,” amesema Nyaitati.
Licha ya kutokea msiba wa mzazi huyo, Nyaitati amesema ratiba ya kumuaga na kumzika Bwire itaendelea kama ilivyopangwa kisha itaandaliwa ratiba nyingine kwa ajili ya mazishi ya mama yake.
“Ndiyo tunatoka Bugando kuchukua mwili wa Bwire kuelekea nyumbani kuaga. Tukishamaliza kuzika tutaandaa ratiba ya kumzika mama yake,” amesema Nyaitati.
Kwa upande wake, Mtoto wa Bwire, Nelson Marwa ameeleza kushtushwa na kifo cha kushtukiza cha bibi yake akisema familia inapambana kukabiliana na maumivu ya kuwapoteza wapendwa wao, lakini ratiba ya mazishi ya baba yake itaendelea kama ilivyopangwa.
“Huu msiba umetokea ghafla sana pamoja na moyo, alikuwa na presha. Kwa hiyo huenda kifo cha baba pia kimechangia. Kama familia tutaendelea na ratiba ya kumuaga baba na kumzika kijijini Nyamwaga ndipo tutarudi kupanga ratiba ya mazishi ya bibi,” amesema Nelson.
Shughuli ya kuaga mwili wa Bwire imeanza kufanyika nyumbani kwake Mahina jijini Mwanza, huku ukitarajiwa kusafirishwa kesho kwenda Kijiji cha Nyamwaga wilayani Tarime mkoani Mara kwa ajili ya maziko.
Enzi za uhai wake Bwire alishiriki kuibua vipaji mbalimbali kwenye soka nchini na miongoni mwa nyota wanaotamba ndani na nje ya nchini ni pamoja na Israel Mwenda (Yanga), Aisha Masaka (Brighton – England) na Aisha Mnunka (Simba Queens).
Wengine ni Balama Mapinduzi (Mashujaa), Hans Masoud (KMC), Dickson Ambundo (Fountain Gate) na Enekia Kasonga (Mazatlan, Mexico).
Mbali na kuibua vipaji kwenye soka, Bwire alikuwa mwanasiasa ambapo amewahi kuongoza kiti cha udiwani Kata ya Mahina na kuwa meya wa Jiji la Mwanza kati ya mwaka 2015-2020.
