Mwanza. Nchagwa Manga, mama mzazi wa Mkurugenzi wa Kituo cha Michezo cha Alliance kilichopo jijini Mwanza, James Bwire aliyefariki Januari 25, 2025, naye amefariki leo Ijumaa Januari 31, siku ya kumuaga mwanaye.
Akizungumza na Mwananchi leo Ijumaa Januari 31, 2025, Mwenyekiti wa Kituo cha Alliance, Stephano Nyaitati amethibitisha kifo cha Nangwa.
Nyaitati amesema kikongwe huyo amefariki asubuhi ya leo (Ijumaa) wakati akipatiwa matibabu katika Hospitali ya Rufaa ya Kanda ya Bugando, saa chache kabla ya kufanyika ibada ya kuagwa mwili wa mtoto wake.
Bwire alifariki Januari 25, 2025 saa 4 usiku wakati akipatiwa matibabu katika Hospitali hiyohiyo ya Bugando, Mwanza baada ya kuugua ugonjwa wa kiharusi kwa muda mrefu.
“Huyu (mama mzazi wa marehemu Bwire) alikuwa anaumwa kwa muda mrefu na alikuwa na kliniki yake ya matibabu kutokana na changamoto ya moyo uliokuwa umepanuka,” amesema Nyaitati.
Licha ya kutokea kwa msiba wa kikongwe huyo, Nyaitati amesema ratiba ya kumuaga na kumzika James Bwire, itaendelea kutekelezwa kama ilivyopangwa, kisha itaandaliwa ratiba nyingine kwa ajili ya mazishi ya mama yake.
“Ndiyo tunatoka Bugando kuchukua mwili wa Bwire kuelekea nyumbani kuaga, tukishamaliza kuzika tutaandaa ratiba ya kumzika mama yake,” amesema Nyaitati.
Kwa upande wake, mtoto wa marehemu Bwire, Nelson Marwa ameeleza kushtushwa na kifo cha cha bibi yake (Nchagwa) akisema familia yao inapambana kukabiliana na maumivu ya kuwapoteza wapendwa wao, hata hivyo ratiba ya mazishi ya baba yake itaendelea kama ilivyopangwa.
“Huu msiba umetokea ghafla sana, pamoja na tatizo la moyo, alikuwa na presha kwa hiyo huenda kifo cha baba (mwanaye) pia kimechangia. Kama familia tutaendelea na ratiba ya kumuaga baba na kumzika kijijini Nyamwaga ,ndipo tutarudi kupanga ratiba ya mazishi ya bibi,” amesema Nelson.
Shughuli ya kuaga mwili wa Bwire imeanza kufanyika nyumbani kwake Mahina jijini Mwanza kisha mwili utasafirishwa kesho kwenda Kijiji cha Nyamwaga wilayani Tarime mkoani Mara kwa ajili ya maziko.
Enzi za uhai wake, Bwire alishiriki kuibua vipaji mbalimbali kwenye soka, wakiwemo wachezaji wanaotamba ndani na nje ya nchini akiwemo, Israel Mwenda (Yanga), Aisha Masaka (Brighton and Holves Albion) na Aisha Mnunka (Simba Queens).
Wengine ni Balama Mapinduzi (Mashujaa), Hans Masoud (KMC), Dickson Ambundo (Fountain Gate) na Enekia Kasonga (Mazatlan, Mexico).
Mbali na kuibua vipaji kwenye soka, Bwire alikuwa mwanasiasa na amewahi kuwa diwani wa Kata ya Mahina na meya wa Jiji la Mwanza kati ya mwaka 2015 – 2020.
